العمله المعدنيه الجديده

بعد نزول العمله المعدنيه الجديده فئة 50قرش وفئة 100قرش واحد جنيه يعنى. الناس بقت دلوقتى منقسمه الى قسمين القسم الاول راضى عن العمله دى وبيتعامل بيها عن قبول ورضا والقسم التانى ساخط عليها ويقولك كده الجنيه بقى ملوش لازمه _هو من امتى كان له لازمه اصلا_ وقيمته ضاعت وكمان شويه هنمشى بسره نحط فيها الجنيهات الفضه دى ونرجع للعصور القديمه وعلى رأى اللمبى (سره من الدنانير) .ولما بحثت هى الحكومه ليه اصلا نزلت العمله دى وجدت انها ليها علاقه بصحة المواطنين حيث انها لا تنقل العدوى بالامراض المعديه على عكس العمله الورقيه اتلى هى ايضا معرضه للتمزيق بكل سهوله وسهلة التزوير كمان ..دى بقى من الصعب جدا انك تزورها يا معلم واخد بالك معايا....انا بقى عن نفسى بتعامل بيها عادى وتقريبا الناس كلها اتعودت عليها الا ان التباعين بتوع السرفيس لسه مش معترفين ان دى عملة الدوله ومش بيرضوا يخدوها ويقولك مش بناخد الفضه ليه يا بنى مش بتاخد الفضه دا انت ممكن تتحبس فيها ؟؟؟؟ يقولك مش مشكله اتحبس بس مش باخد الفضه .دا جانب وهو السرفيس وفى جوانب تانيه كتير مش بيرضوا يخدوا الفضه ولما بيخدوها يبصلك كأنك حطيت فى ايده مية نار ......يالا بكره يتعودوا وزى ما المثل بيقول كتر التكرار يعلم الحمار مع ان الحمار ذكى والله ومظلوم معانا .........يالا كفايه كده .............وتقبلوا تحياتى

انا والاثاره

هو موضوع شغل بالى فى الفتره الاخيره ....هو ليه البنات بيلبسلوا لبس بالطريقه المثيره لحاجات كتير بقى منها على سيبل المثال لا الحصر طبعا (شهوه الرجال _ سخط الكبار ...الخ ) ومن الملاحظ ان فى بعض البنات بيلبسوا بالمنظر ده وهما مش راضين عن نفسهم _ شىء عجيب والله_ تيجى تقولها طيب بتلبسى كده ليه تقولك علشان انا اتعودت البس كده . ماما عودتنى البس بالطريقه دى واحط مكياج بالطريقه دى ومش عارف خلاص اغير منها . واحد يسألنى سؤال محرج ويقولى وانت ايه اللى فكرك بالموضوع ده دلوقتى هجاوب عليه بكل بساطه واقله بص يا تافه: انا حصل معايا موقف لطيف اعد فى العربيه راجع من الجامعه اعد جنب الشباك كافى خير شرى لا بهش ولا بنش لقيت واحده كتكوته اموره قطقوطه _ كفايه كده عشان الراقبه ( الواحد مش مستغنى عن عمره) _ جت اعدت جنبى انا طبعا كانت نسبة الايمان عندى مرتفعه فى الوقت ده وكنت لابس الهندفرى _السماعه بتاع الودن يعنى _ ومشغل قران شويه والعربيه مشيت وعشت مع الطريق لقيت صابع عامل زى سن الابره بيتغز فى رجلى _ متحاسبى يا ست انتى خلى عند اللى .....دم بالراحه شويه ( طبعا مش قلت كده خالص .دا كنت ناوى اقوله قبل ما ابص فى وشها ولكن بعد ما بصيت نسيت اللى كنت عايز اقوله ده ) _ ايوه فى ايه؟ انا قولت هتقولى متدفع الحساب يا روح ......وطبعا مش قالت كده ....تخيل انا بخيالك الواسع طلبت ايه؟......طلبت منى ابعتلها السوره اللى انا مشغلها دى بلوتوث ...طبعا انت تبص من فوق ومن تحت وتستغرب ازاى واحده عامله فى نفسها تطلب الطلب ده ...طبعا بعتهلها كنت عايز اكلمها فى الموضوع اللى انا بكلمكم فيه دلوقتى بس قلت بلاش يا عم لحد من اللى اعدين جنبك فى العربيه يقيم عليك الحد..........

وبعد اللى حصل ده وانا بفكر ازاى نعمل حمله نوقف اللى بيحصل ده

لو حد عنده اقتراح يطلب 0900 0900

وكل يوم نسمع حوادث اغتصاب حوادث تحرش ليه دا كله بيحصل يا جماعه ؟؟؟؟؟

اكيد الجواب معروف ......

واسف جدا انى طولت عليكم

وعيش وعيشى

التربيه العسكريه

لم أكاد اخرج من مطحنة الامتحانات الا وقد وجدت نفسى أقع فى هاوية التربيه العسكريه اى نعم الناس كلها بتقول اننا مستريحين خالص علشان اسبوع شباب الجامعات اللى هيفتتحه الريس مبارك(زاد لنا الله فى عمره)وعلشان كده هما طلعونا بره الحرم الجامعى لدواعى امنيه وفعلا الواحد مش حاسس انه مرهق اوى بدليل انى بروح الساعه 10.30ص وبرجع الساعه4 عصرا وده طبعا انجاز كبير بالنسبه للى عمل التربيه العسكريه قبل كده ....بس الواحد كان نفسه يستريح شويه فى الاجازه بس مش مهم اهى قربت تخلص ويارب تخلص على خير.....معلشى طولت عليكم .....أشوفكم بخير ......ســـــــــــــــــــــــــــــــلام

أخيراً خلصت امتحانات .....

منذ فتره ليست بوجيزه اى مايزيد على شهر تقريبا بدأت فتره عصيبه فى حياتى وبالتأكيد هى طبعا فترة الامتحانات وهى لا تعنى بالنسبه لى فتره لتقيم مدى استيعاب الطالب او قياس مدى فهمه وتركيزه بل تعنى قياس مدى قدرة الطالب العصبيه والنفسيه والبدنيه على تحمل اكبر كميه من الامتحانات فى فتره وجيزه(قليله).
لكن تدور فى رأسى عدة تساؤلات هى : هذه فعلا هى سياسة ادارة الكليه ؟؟ ولكن لماذا؟؟ أم انها تحدث بعفويه منهم ؟؟ ولكن لماذا لا يشعرون بمدى الاسى والمعانها التى نكون فيها ؟؟؟....
خلاصة الكلام الحمد لله انها عدت على خير بس بعد تحطيم كل المجهود العضلى والعصبى والنفسى.........وعقبال النتيجه ويـــــــــــــــــــارب تكون حلوه ......اشوفكم بخير ...........ســــــــــــــــــــــــــــلام